𑢹𑢩𑢩 𑢬𑢣𑢻𑢢

𑢬𑣁𑣎𑣂 𑣜𑣈 𑣖𑣈𑣓𑣄 – 𑢬𑣃𑣛𑣂 𑣗𑣈𑣋𑣜 𑢽𑣂𑣜𑣎𑣉𑣓 𑣏𑣂𑣚𑣂𑣌𑣁 𑣕𑣈 𑣙𑣉𑣗𑣁𑣓𑣁? 𑢨𑣓𑣁 𑣖𑣈𑣓𑣕𑣈 𑣌𑣃𑣛𑣂𑣔𑣉 ‘𑢽𑣂𑣜𑣎𑣉𑣓 𑣜𑣈𑣅𑣄 𑣌𑣉 𑣖𑣈𑣕𑣄.’ 𑢬𑣃𑣛𑣂 𑣝𑣉𑣗𑣉𑣔𑣉 𑣜𑣈𑣅𑣄 𑣉𑣜𑣕𑣉𑣔𑣉 𑣝𑣂𑣜𑣎𑣉𑣓 𑣜𑣈𑣅𑣄 𑣞𑣉𑣕𑣁 𑣏𑣂 𑣗𑣃𑣒𑣁 𑣋𑣈 𑣕𑣓𑣁. 𑢬𑣃𑣛𑣂 𑣙𑣉𑣖𑣉𑣙𑣔𑣉 𑣖𑣂𑣅𑣑 𑣎𑣂𑣓𑣂𑣆𑣑𑣓 ‘𑣝𑣂𑣜𑣎𑣉𑣓 𑣌𑣉𑣛’ 𑣋𑣈 𑣕𑣓𑣁. 𑢩𑣌𑣉𑣅 𑣕𑣙𑣄 𑣜𑣈 𑢽𑣂𑣜𑣎𑣉𑣓 𑣜𑣈𑣅𑣄 𑣏𑣁𑣀𑣏 𑣖𑣈𑣓𑣄, 𑣈𑣓𑣂𑢦 𑣋𑣈 ‘𑢹𑣉𑣉 𑢬𑣃𑣛𑣂’𑣗𑣃 𑣖𑣈𑣕𑣆𑣅𑣁.𑢶𑣁𑣓𑣖𑣂 𑣙𑣉𑣖𑣉𑣙 𑣗𑣆-𑣗ÿ𑣈𑣑𑣈𑣓 𑣕𑣈𑣅𑣄 𑣌𑣉𑣛 𑣉𑣌𑣉𑣅 𑣕𑣙𑣄 𑣜𑣈 𑣖𑣈𑣓𑣄 𑣈𑣓𑣂𑢦 𑣋𑣈 𑣙𑣉𑣉 𑣌𑣃𑣛𑣂𑣗𑣃 𑣖𑣈𑣕𑣆𑣅𑣁. 𑢶𑣁𑣓𑣖𑣂 𑣝𑣂𑣜𑣎𑣉𑣓 𑣜𑣈𑣅𑣄 𑣘𑣈𑣛𑣈𑣄 𑣉𑣌𑣉𑣓 𑣜𑣈 𑣝𑣜𑣃𑣗𑣈𑣓𑣁 𑣈𑣓𑣁 𑣋𑣈 𑣙𑣉𑣉 𑣌𑣃𑣛𑢢 𑣜𑣈𑣅𑣄 𑣉𑣓𑣉𑣕𑣉𑣜𑣓 𑣉𑣜𑣕𑣉 𑣖𑣈𑣓𑣈 𑣜𑣈 𑣘𑣃𑣜𑣄 𑣗𑣃𑣋𑣂𑣓𑣁. 𑢨𑣓𑣁 𑣋𑣈 𑣉𑣓𑣉𑣕𑣉𑣜𑣓 𑣚𑣈𑣌𑣁 𑣕𑣈 ‘𑢷𑣙-𑣋𑣂𑣕𑣂𑣚’ 𑣏𑣂 𑣗𑣃 𑣖𑣈𑣕𑣄. ‘𑢷𑣙-𑣋𑣂𑣕𑣂𑣚’ 𑣋𑣈 ‘𑣌𑣉𑣉𑣚’𑣌𑣉 𑣖𑣉𑣕𑣄. ‘𑢬𑣉𑣉𑣚’ 𑣝𑣉𑣗𑣉𑣔𑣉 𑣜𑣈𑣅𑣄 𑣆𑣓𑣂𑣕𑣑 𑣕𑣓𑣁. 𑢨𑣓𑣁𑣖𑣈𑣓𑣕𑣈 𑣁𑣔𑣂 𑣗𑣊𑣝𑣉 𑣜𑣈𑣓𑣌𑣉 𑣓𑣙𑣄 𑣎𑣌𑣈𑣑 ‘𑣌𑣉𑣉𑣚’ 𑣖𑣈𑣓𑣕𑣈𑣌𑣉 𑣖𑣈𑣕𑣁𑣗𑣃𑣁. ‘𑢬𑣉𑣉𑣚’ 𑣙𑣉𑣓𑣌𑣉 𑣕𑣈𑣔𑣉. 𑢹𑣂𑣓𑣔𑣂 𑣕𑣈𑣔𑣉 𑣓𑣈𑣓𑣁 𑣋𑣈 𑣌𑣉 𑣖𑣈𑣕𑣄. 𑢨𑣓𑣚𑣈𑣌𑣁 𑣕𑣈 𑣉𑣞𑣓𑣔𑣉𑣌𑣉 𑣚𑣈𑣌𑣁 𑣘𑣉𑣏𑣁 𑣕𑣑𑣁, 𑣉𑣌𑣉𑣓𑣁 𑣏𑣂 𑣁𑣔𑣂 𑣗𑣊𑣝𑣉 𑣜𑣈 ‘𑢽𑣂𑣝𑣙𑣃 𑢷𑣈𑣈𑣔’ 𑣖𑣈𑣓𑣕𑣈 𑣏𑣉𑣚𑣉𑣓 𑣖𑣈𑣓𑣄. 𑢳𑣈𑣓 𑢽𑣂𑣝𑣙𑣃 𑢷𑣈𑣈𑣔’𑣔𑣉 𑢬𑣉𑣉𑣚 𑣗𑣊𑣝𑣉𑣌𑣉 𑣕𑣙𑣄 𑣜𑣈𑣋𑣈 𑣖𑣈𑣓𑣄. 𑢽𑣁𑣜𑣂 𑣌𑣁𑣎𑣂 𑣕𑣓 𑣋𑣈𑣅𑣁 𑣏𑣂 ‘𑢷𑣙-𑣋𑣂𑣕𑣂𑣚’ ‘𑢬𑣉𑣉𑣚’, ‘𑢬𑣉𑣉𑣛’, 𑢿𑣑𑣌𑣞𑣛𑣌𑣀𑣍 𑣞𑣗𑣂𑣓 𑣋𑣈 𑢹𑣉𑣉 𑢬𑣃𑣛𑣂 𑣜𑣈𑣅𑣄 𑣉𑣓𑣉𑣕𑣉𑣜𑣓 𑣘𑣒𑣈𑣅𑣓 𑣝𑣉𑣗𑣉𑣔𑣉𑣌𑣉 𑣕𑣓𑣁. “𑢼𑣂𑣚𑣁-𑣖𑣁𑣚𑣁 𑢾𑣂𑣍𑣗𑣃𑣆 𑣕𑣚𑣁-𑣖𑣚𑣁 𑣜𑣈 ‘𑢬𑣉𑣌𑣉𑣏𑣉𑣄’ 𑣓𑣃𑣕𑣃𑣖 𑣈𑣞𑣃 𑣖𑣜𑣀 𑣙𑣁𑣕𑣃 𑣖𑣈𑣓𑣄. 𑢬𑣉𑣌𑣉𑣏𑣉𑣄 𑣙𑣁𑣕𑣃 𑣜𑣈 𑣖𑣂𑣅𑣑 𑣈𑣞𑣃 𑣘𑣃𑣜𑣓𑣁 𑢾𑣉𑣜𑣌𑣁𑣜𑣂 𑣖𑣉𑣀𑣑𑣉 𑣖𑣈𑣓𑣄. 𑢳𑣈𑣓 𑣖𑣉𑣀𑣑𑣉𑣔𑣉 ‘𑢬𑣉𑣌𑣉𑣏𑣉𑣄 𑢡𑣘𑣜 𑢸ÿ𑣁𑣆𑣖𑣜𑣂 𑢦𑣞ì𑣃𑣚’ 𑣖𑣈𑣓𑣕𑣈 𑣇𑣖𑣂 𑣅𑣌𑣁𑣓𑣁. 𑢬𑣉𑣌𑣉𑣏𑣉𑣄 𑣙𑣁𑣕𑣃 𑣎𑣘𑣄-𑣓𑣉𑣄 𑣜𑣈𑣋𑣈 𑣖𑣂𑣅𑣑 𑣁𑣒𑣉×𑣁𑣜𑣂 𑣙𑣁𑣁𑣒𑣉 𑣙𑣉𑣗𑣁𑣉𑣄𑣁 𑣉𑣌𑣉𑣓𑣁 𑣏𑣂 𑢳𑣋𑣜 𑣙𑣁𑣁𑣒𑣉 𑣖𑣈𑣓𑣕𑣈 𑣋𑣉𑣒𑣁-𑣖𑣃𑣚𑣂 𑣇𑣖𑣂 𑣅𑣌𑣁𑣓𑣁.” “𑢫𑣃𑣜𑣁𑣙𑣜 𑣇𑣚𑣀𑣔𑣉 𑣞𑣗𑣂𑣓 𑣎𑣘𑣄-𑣎𑣘𑣄 𑣖𑣉𑣀𑣑𑣉, 𑢾𑣉𑣜𑣌𑣁𑣜𑣂 𑣌𑣖𑣂-𑣉𑣛𑣄𑣌𑣉 𑣈𑣖𑣓 𑣞𑣈𑣕𑣄 𑣋𑣈 𑣙𑣉𑣗𑣁𑣉𑣄𑣁. 𑢾𑣈𑣕𑣄 𑣖𑣉𑣀𑣑𑣉 𑣇𑣚𑣀𑣔𑣉 𑣎𑣉𑣄 𑣞𑣘𑣁, 𑣋𑣃𑣜𑣂𑣄 𑣞𑣘𑣁𑣌𑣉 𑣈𑣖𑣓 𑣙𑣉𑣗𑣁𑣓𑣁. 𑢡𑣍𑣎𑣁𑣙 𑣋𑣈 𑣏𑣃𑣒𑣂 𑣓𑣖𑣉𑣄𑣁 𑣖𑣈𑣓𑣕𑣈 𑣞𑣂𑣒𑣂𑣅𑣁𑣌𑣉 𑣖𑣉𑣀𑣑𑣉 𑣉×𑣄-𑣔𑣃×𑣁𑣜, 𑣜𑣁𑣏𑣁 𑣈𑣖𑣓 𑣎𑣉𑣄 𑣋𑣃𑣜𑣂𑣄 𑣞𑣘𑣁 𑣜𑣈𑣌𑣉 𑣙𑣖𑣃𑣜-𑣕𑣌𑣃𑣜 𑣕𑣓𑣌𑣉 𑣁𑣏𑣃 𑣁𑣌𑣁𑣓𑣉𑣄𑣁.” “𑢬𑣉𑣌𑣉𑣏𑣉𑣄 𑢶𑣉𑣀𑣑𑣉𑣉 𑢫𑣃𑣜𑣁𑣙𑣜 𑣇𑣚𑣀𑣌𑣉 𑣞𑣈𑣕𑣄 𑣖𑣉𑣀𑣑𑣉 𑣕𑣑𑣁. 𑢫𑣃𑣓𑣁 𑣖𑣒𑣁𑣞𑣉𑣜 𑣖𑣈𑣓𑣁𑣌𑣑 𑣋𑣈𑣅𑣁, 𑣞𑣗𑣂𑣓 𑣞𑣂𑣒𑣂𑣅𑣁 𑣙𑣉𑣓𑣌𑣉 𑣈𑣞𑣃𑣌𑣉 𑣗𑣉𑣜𑣉 𑣕𑣂𑣆𑣅𑣁. 𑢯𑣂𑣓𑣄 𑣞𑣂𑣒𑣂𑣅𑣁𑣌𑣉 𑣌𑣌𑣉 𑣗𑣉𑣜𑣉𑣅𑣁 𑣉𑣚-𑣘𑣛𑣁𑣉 𑣌𑣁 𑣈𑣕𑣉 𑣌𑣈𑣙 𑣜𑣈𑣔𑣉 𑣞𑣉𑣒𑣁 𑣋𑣈 𑣓𑣖𑣉𑣄 𑣕𑣈𑣔𑣉. 𑢺𑣐𑣑𑣂𑣅𑣁 𑣜𑣈𑣔𑣉 𑣘𑣉𑣏𑣁𑣔𑣉 𑣗𑣓𑣉𑣄𑣁. 𑢫𑣂𑣞𑣂𑣜-𑣋𑣖𑣀 𑣗𑣉𑣜𑣉 𑣇𑣛𑣃𑣄𑣌𑣉 𑣕𑣈 𑣞𑣂𑣒𑣂𑣅𑣁𑣌𑣉 𑣖𑣈𑣕𑢶 𑣁𑣘𑣓-𑣔𑣘𑣆 𑣘𑣆𑣒𑣂𑣌𑣉 𑣜𑣈𑣌𑣉 𑣌𑣃𑣜𑣃𑣖𑣃𑣒𑣃 𑣚𑣋𑣁𑣓𑣁.” “𑢡𑣏𑣃𑣕𑣓 𑣜𑣈𑣋𑣈 𑣖𑣈𑣓𑣄𑣈𑣅𑣁, 𑣖𑣈𑣓𑣔𑣉 𑣁𑣏𑣃-𑣁𑣏𑣃 𑣕𑣈𑢨 𑣚𑣋𑣁 𑣏𑣗𑣁𑣅𑣓 𑣚𑣈𑣌𑣁. 𑢩𑣌𑣉𑣅 𑣌𑣁𑣎𑣂 𑣕𑣈 𑣌𑣉𑣗𑣉𑣜𑣁𑣉 𑣏𑣗𑣁𑣅𑣓 𑣚𑣈𑣌𑣁𑢨.” 𑢷𑣁𑣜𑣁 𑢶𑣉𑣓𑣂𑣒𑣜 – ‘𑢩𑣌𑣉𑣅 𑣌𑣅𑣄 𑣕𑣓𑣁 𑣁𑣍 𑣕𑣄 𑣞𑣗 𑣁𑣋𑣃𑣆𑢶𑣈! 𑢳𑣈𑣓 𑣎𑣁𑣓𑣃𑣖 𑣎𑣁𑣒𑣁 𑣞𑣗-𑣕𑣉𑣜𑣞𑣁 𑣌𑣈𑣙𑢶𑣈!’ “𑢼𑣃𑣋𑣃𑣓𑣁 – 𑢡𑣅𑣃𑣖 𑣕𑣉𑣜𑣞𑣁𑢨 𑣞𑣈𑣓𑣉𑣄 𑣕𑣗𑣈𑣅𑣓𑣁. 𑢮𑣁𑣓𑣃𑣖 𑣎𑣁𑣒𑣁𑢨 𑣞𑣗 𑣕𑣉𑣜𑣞𑣁-𑣕𑣗 𑣌𑣈𑣑𑣁. 𑢩𑣌𑣉𑣅 𑣗𑣉𑣜𑣉 𑣕𑣈𑢨 𑣇𑣌𑣃𑣓 𑣕𑣓𑣁? 𑢮𑣆𑢦 𑣓𑣂𑣜 𑣕𑣓𑣁, 𑣕𑣜𑣁𑣔𑣉𑢨 𑣓𑣂𑣜 𑣗𑣈𑣒𑣁 𑣌𑣈𑣑𑣌𑣉𑣁. 𑢾𑣂𑣒𑣂𑣅𑣁 𑣞𑣉𑣖𑣅 𑣖𑣈𑣓𑣁𑣌𑣑 𑣋𑣈𑣅𑣁, 𑣗𑣉𑣜𑣉 𑣋𑣂𑣅𑣃𑣄 𑣋𑣂𑣞𑣂𑣜 𑣋𑣖𑣀𑣌𑣉 𑣖𑣁 𑣗𑣓𑣉𑣄𑣁. 𑢷𑣈𑣒𑣁 𑣕𑣉𑣜𑣞𑣁 𑣈𑣞𑣁𑢨 𑣙𑣁𑣁𑣀𑣞𑣁𑣌𑣉 𑣕𑣓 𑣈𑣖𑣓𑣌𑣉 𑣕𑣓𑣁!” 𑢷𑣁𑣜𑣁 𑢶𑣉𑣓𑣂𑣒𑣜 – “𑢳𑣈𑣓 𑢶𑣁𑣚𑣁 𑣙𑣉𑣓-𑣈𑣜𑣁𑣔𑣉 𑣈𑣞𑣃 𑣚𑣐𑣑𑣂𑣅𑣁, 𑣎𑣁𑣉 𑣋𑣈𑢨 𑣘𑣉𑣏𑣁𑣓𑣁. 𑢵𑣂𑣞𑣂𑣍𑣔𑣉 𑣁𑣚𑣉𑢶 𑣗𑣋𑣈𑣆𑣅𑣁, 𑣁𑣚𑣉𑣖 𑣘𑣉𑣏𑣁𑣆𑣅𑣁, 𑣋𑣃𑣜𑣂𑣄 𑣓𑣈𑣚 𑣌𑣈𑣙 𑣜𑣈𑣔𑣉𑢨 𑣞𑣂𑣖𑣒𑣃𑣂-𑣗𑣁 𑣅𑣁. 𑢶𑣃𑣒𑣁𑣌𑣉𑢨 𑣏𑣘𑣃 𑣈𑣞𑣈𑣑 𑣕𑣗𑣈𑣓𑣁. 𑢡𑣈𑣋𑣈 𑣈𑣞𑣃𑢦 𑣙𑣂𑣚𑣀𑣀𑣉𑣄 𑣕𑣓𑣁?” “𑢼𑣃𑣋𑣃𑣓𑣁 – 𑢬𑣃𑣆 𑣙𑣉𑣓𑣌𑣉 𑣎𑣌𑣈𑣑 𑣌𑣁𑢨 𑣘𑣉𑣏𑣁𑣌𑣉 𑣕𑣓𑣁. 𑢾𑣗𑣂𑢦 𑣙𑣁𑣁𑣀𑣞𑣁𑣌𑣉 𑣕𑣓 𑣈𑣖𑣓𑣌𑣉 𑣕𑣓𑣁.” “𑢬𑣃𑣆 𑣙𑣉𑣓𑣌𑣉 𑣕𑣚𑣁 𑣜𑣈 𑣖𑣂𑣑𑣉𑣙 𑢶𑣁𑣚𑣁 𑣙𑣉𑣓-𑣈𑣜𑣁𑢨 𑣕𑣆𑣌𑣈𑣓𑣁. 𑢳𑣂𑣜 𑣗𑣈𑣒𑣁 𑣕𑣉𑣜𑣞𑣁 𑣈𑣓 𑢶𑣁𑣚𑣁 𑣙𑣉𑣓 𑣈𑣜𑣁 𑣙𑣁𑣁𑣀𑣞𑣁 𑣕𑣗 𑣌𑣂𑢦 𑣅𑣁𑢨.” 𑢶𑣁𑣚𑣁 𑣙𑣉𑣓 𑣈𑣜𑣁 – 𑢶𑣁 𑣋𑣉, 𑢷𑣁𑣗𑣁 𑣋𑣉 𑣖𑣈𑣓-𑣖𑣈𑣓𑣕𑣈 𑣜𑣄-𑣜𑣄 𑣕𑣈𑢨 𑣞𑣈𑣓𑣉𑣄 𑣅𑣓𑣁. 𑢩×𑣄’𑢨 𑣗𑣈𑣒𑣁 𑣌𑣈𑣑𑣁. 𑢼𑣄 𑣕𑣓 𑣋𑣈𑣅𑣁𑢨. 𑢡𑣘𑣃𑣕𑣈 𑢾𑣃𑣌𑣃𑣜𑣁 𑢶𑣁𑣚𑣁 𑣌𑣃𑣚𑣂𑣆 𑣕𑣓 𑣋𑣈𑣅𑣁 – 𑢬𑣂 𑣙𑣉𑣚𑣉? 𑢬𑣂 𑣙𑣉𑣚𑣉? ‘𑢶𑣈𑣓𑣔𑣉, 𑢶𑣁𑣚𑣁 𑣙𑣉𑣓 𑣈𑣜𑣁 𑣌𑣃𑣞𑣃𑣑-𑣌𑣃𑣞𑣃𑣑 𑣕𑣓 𑣜𑣄 𑣜𑣈𑣋𑣈 𑣖𑣈𑣓𑣄𑢨𑣅𑣁.’ 𑢾𑣃𑣌𑣃𑣜𑣁 𑢶𑣁𑣚𑣁 – 𑢩𑣌𑣉𑣅 𑣕𑣖 𑣌𑣈𑣑𑢶𑣈𑣅𑣁, 𑣔𑣉𑣚𑣀 𑣖𑣉𑣀𑣑𑣉𑢭 𑣞𑣈𑣓𑣉𑣄 𑣕𑣓𑣁! ‘𑢦𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉! 𑢦𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉..! 𑢶𑣈𑣓-𑣖𑣈𑣓 𑣕𑣈 𑢶𑣉𑣀𑣑𑣉𑢨 𑣗𑣈𑣒𑣁 𑣅𑣓𑣁.’ ‘𑢬𑣉𑣓 𑣖𑣁𑣜𑣁! 𑢬𑣉𑣓 𑣖𑣁𑣜𑣁!... 𑣖𑣈𑣓-𑣖𑣈𑣓 𑣕𑣈 𑣋𑣉𑣒𑣁𑢨 𑣌𑣌𑣁𑣚𑣁 𑣁𑣌𑣁𑣑𑣁. 𑢶𑣒𑣁𑣞𑣉𑣜𑣌𑣉 𑣈𑣖𑣓’𑢨 𑣋𑣉𑣀𑣔𑣈 𑣈𑣜𑣀 𑣕𑣗 𑣕𑣓𑣁.’ ‘𑢮𑣉𑣌𑣁 𑣚𑣈𑣌𑣁 𑣙𑣉×𑣜 𑣁𑣌𑣁𑣓𑣁𑢨 𑣓𑣈𑣚 𑣌𑣂𑢦 𑣅𑣁 𑣏𑣂 ‘𑣆𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉! 𑢦𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉! 𑢬𑣎𑣂 𑣕𑣓 𑣜𑣈𑣋𑣈 𑣖𑣈𑣓𑣄𑢨 𑣅𑣁.’ ‘𑢳𑣈𑣘𑣙𑣔𑣉 𑣖𑣒𑣁𑣞𑣉𑣜𑣌𑣉 𑣈𑣖𑣓 𑣞𑣉𑣖𑣎𑣁𑣉 𑣕𑣓 𑣜𑣈𑣋𑣈 𑣖𑣈𑣓𑣄𑣌𑣉𑣁….’ 𑢼𑣃𑣋𑣃𑣓𑣁 – ‘𑢹𑣉𑣓 𑣋𑣈 𑣞𑣂𑣒𑣂𑣅𑣁 𑣖𑣈𑣓𑣁𑣌𑣑 𑣋𑣈𑣅𑣁. 𑢨𑣞𑣃 𑣏𑣉𑣍𑣏𑣉𑣛𑣉 𑣓𑣉𑣄 𑣋𑣈 𑣖𑣈𑣓𑣄𑢨 𑣅𑣁. 𑢷𑣉𑣜𑣉 𑣋𑣂𑣅𑣃𑣄𑣌𑣉 𑣗𑣓𑣉𑣄𑣁. 𑢹𑣃𑣛𑣂𑣊-𑣖𑣜𑣀 𑣜𑣈𑣅𑣄 𑣖𑣁𑣓 𑣋𑣈 𑣗𑣓𑣉𑣄𑣁. 𑢵𑣖𑣂𑣆𑢶𑣈 𑣖𑣈𑣕𑣆 𑣜𑣈𑣔𑣉𑢨 𑣕𑣖 𑣜𑣈𑣓𑣙𑣌𑣉𑣁.’ “𑣜𑣀𑣌𑣉 𑣎𑣌𑣈𑣑 𑣌𑣁𑢨 𑣗𑣉𑣜𑣉 𑣋𑣂𑣅𑣃𑣄 𑣕𑣈𑣌𑣉𑣁. 𑢡𑣏𑣃𑣆 𑣜𑣈𑣔𑣉 𑣈𑣞𑣃𑢦 𑣁𑣏𑣃𑣓𑣁. 𑢡𑣏𑣃𑣓𑣁𑢨 𑣖𑣈𑣓𑣕𑣈 𑣈𑣞𑣃𑣌𑣉 𑣜𑣁𑣁𑣀𑣞𑣁 𑣕𑣂𑣆𑣅𑣁.” 𑢶𑣜𑣀 𑣔𑣁𑣔𑣁 – ‘𑢷𑣉𑣜𑣉 𑣜𑣈𑣋𑣈 𑣖𑣈𑣓𑣄𑢨 𑣅𑣁. 𑢦𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉! 𑢦𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉! 𑢬𑣉𑣓 𑣖𑣁𑣜𑣁! 𑢬𑣉𑣓 𑣖𑣁𑣜𑣁! 𑢳𑣈𑣓 𑣌𑣌𑣁𑣚𑣁 𑣌𑣉𑣜𑣀 𑣋𑣈 𑣆𑣌𑣂𑣜 𑣎𑣂𑣗𑣉𑣌𑣉 𑣜𑣈 𑣙𑣂𑣀𑣑𑣃𑣊 𑣗𑣂𑣅𑣃𑣜𑣈𑣓 𑣕𑣓𑣁.’ “𑢾𑣂𑣔𑣁-𑣞𑣁𑣔𑣁, 𑣙𑣘𑣁 𑣞𑣔𑣅, 𑣓𑣉𑣜𑣉𑣖 𑣎𑣕𑣂𑣅𑣑, 𑣝𑣈𑣅𑣁𑣀-𑣎𑣉𑣓𑣕𑣉𑣜 𑣓𑣉𑣄 𑣖𑣈𑣓𑣄𑢨𑣅𑣁. 𑢼𑣃𑣘𑣃𑣇-𑣕𑣘𑣖, 𑣋𑣉𑣘𑣉𑣀𑣔𑣈𑣈 𑣜𑣀𑣌𑣉 𑣅𑣕𑣈 𑣈𑣞𑣃 𑣞𑣓𑣂𑣊 𑣜𑣈 𑣖𑣈𑣓𑣄𑢨 𑣅𑣁. 𑢡𑣘𑣃𑣁𑣄 𑣚𑣈𑣞𑣈𑣜 𑣖𑣈𑣑-𑣖𑣉𑣏𑣁 𑣋𑣈𑢨 𑣁𑣋𑣃𑣁𑣓𑣁… 𑣓𑣙𑣄𑣔𑣉, 𑣇𑣀𑣑𑣂𑢭𑣔𑣉𑣌𑣉 𑣕𑣖𑣂𑣆 𑣋𑣈𑣅𑣁, 𑣌𑣌𑣉 𑣘𑣉𑣏𑣁𑣆𑣅𑣁, 𑣓𑣈𑣓 𑣗𑣉𑣜𑣉 𑣇𑣛𑣃𑣄 𑣜𑣈𑣋𑣈 𑣖𑣈𑣓𑣄𑢨𑣅𑣁.” ‘𑢷𑣉𑣜𑣞𑣁 𑣌𑣈𑣒𑣈𑣄 𑣖𑣜𑣀 𑣔𑣁𑣆 𑣕𑣄 𑣕𑣈𑢨 𑣞𑣈𑣓𑣉𑣄 𑣅𑣓𑣁. 𑢶𑣈𑣓𑣔𑣉 𑣌𑣎𑣂𑣖𑣁 𑣌𑣁𑢨 𑣈𑣕𑣉𑣅 𑣕𑣓𑣁. 𑢾𑣖𑣁𑢨 𑣌𑣉𑣜𑣉𑣈-𑣖𑣉𑣒𑣉𑣈 𑣋𑣈𑣅𑣁.’ ‘𑢡𑣌𑣉𑣁𑣄 𑣘𑣁𑣛𑣁𑣉 𑣏𑣚𑣁𑣉 𑣁𑣌𑣓 𑣕𑣆𑣌𑣈𑣓𑣁. 𑢴𑣃×𑣁𑣜 𑣕𑣄 𑣜𑣈 𑣞𑣖𑣁 𑣋𑣈𑢨 𑣎𑣘𑣄-𑣗𑣁𑣓 𑣕𑣓𑣁, 𑣕𑣈𑣀𑣑𑣈𑣜 𑣙𑣈𑣀𑣅𑣉𑣜-𑣗𑣁𑣓 𑣕𑣓𑣁.’ 𑢶𑣜𑣀 𑣔𑣁𑣆 – “𑢳𑣈𑣚 𑣕𑣉𑣜𑣞𑣁 𑣖𑣉𑣓-𑣖𑣉𑣓 𑣕𑣈𑢨 𑣌𑣘𑣁𑣎𑣂 𑣕𑣓 𑣏𑣂 𑣏𑣂𑣌𑣁𑣕𑣈 𑣕𑣂𑣞𑣂𑣊𑣔𑣉 𑣓𑣈𑣓 𑣙𑣉𑣓𑣔𑣉 𑣓𑣈𑣌𑣁𑢨 𑣕𑣈𑣀𑣑𑣈𑣜 𑣙𑣈𑣀𑣅𑣉𑣜-𑣗𑣁𑣓 𑣕𑣓𑣁! 𑢧𑣛𑣃𑣄 𑣕𑣓 𑣜𑣈𑣋𑣈 𑣖𑣈𑣓𑣄𑢨𑣅𑣁. 𑢶𑣈𑣓𑣔𑣉 𑣌𑣎𑣂𑣌𑣉𑣖𑣁 𑣌𑣁𑢨 𑣈𑣕𑣉𑣅 𑣕𑣓 𑣋𑣈𑣅𑣁. 𑢯𑣂𑣓𑣄𑣏𑣂 𑣁𑣌𑣉𑣁𑣄 𑣘𑣁𑣛𑣁𑣉 𑣙𑣉𑣗𑣁 𑣁𑣌𑣁𑣓𑣁. 𑢩𑢿 𑣕𑣈𑣅𑣄𑣖𑣁 𑣌𑣁𑢨 𑣗𑣉𑣜𑣞𑣁𑣅 𑣕𑣓𑣁.” “𑢯𑣂𑣓𑣄𑣌𑣉 𑣕𑣉𑣜𑣀 𑣙𑣉𑣗𑣁𑣅𑣓 𑣋𑣈𑣅𑣁! 𑢳𑣈𑣓 𑣜𑣈𑣅𑣄 𑣎𑣁𑣓 𑣁𑣒𑣁𑣌𑣜 𑣋𑣈 𑣗𑣓𑣉𑣄 𑣅𑣓𑣁. 𑢯𑣂𑣓𑣄𑣏𑣂 𑣌𑣌𑣚𑣁 𑣌𑣉𑣜𑣀𑣌𑣉𑣖𑣁 𑣁𑣇𑣜𑣂𑣌𑣉 𑣁𑣅𑣃𑣖 𑣗𑣈𑣒𑣁𑣅 𑣕𑣈𑣔𑣉 𑣉𑣌𑣉𑣅 𑣋𑣈 𑣌𑣌𑣉 𑣏𑣂𑣜𑣋𑣚 𑣌𑣂𑢦𑣅𑣁.” 𑢶𑣜𑣀 𑣔𑣁𑣔𑣁 – “𑢹𑣉𑣒𑣉𑣌𑣜 𑣋𑣈, 𑣙𑣘𑣁𑣕𑣈 𑣏𑣃𑣆𑣚𑣁 𑣋𑣈𑢨 𑣞𑣈𑣓𑣉𑣄 𑣁𑣕𑣉𑣖 𑣕𑣗𑣈 𑣅𑣓𑣁, 𑣉𑣌𑣉𑣅 𑣋𑣈 𑣌𑣌𑣉 𑣏𑣂𑣜𑣋𑣚 𑣌𑣂𑢦𑣅𑣁. 𑢧𑣀𑣑𑣂𑢭 𑣕𑣄 𑣕𑣈𑢭 𑣞𑣈𑣓𑣉𑣄 𑣕𑣗 𑣅𑣓𑣁. 𑢾𑣈𑣓 𑣋𑣈 𑣞𑣈𑣒𑣈𑣜 𑣗𑣉𑣜𑣉𑣋𑣈 𑣖𑣜𑣀 𑣔𑣉𑣚𑣀’𑢭 𑣖𑣈𑣕𑣆 𑣕𑣓𑣁. 𑢵𑣂𑣙 𑣜𑣈𑢭 𑣞𑣗 𑣕𑣗 𑣌𑣂𑢦𑣅𑣁.” ‘𑢳𑣈𑣘𑣙𑣔𑣉 𑢾𑣃𑣌𑣃𑣜𑣁 𑣖𑣁𑣚𑣁 𑣌𑣈𑣛𑣈𑣄 𑣜𑣈𑣓𑣙’𑢨 𑣌𑣌𑣁𑣚𑣁 𑣁𑣌𑣑 𑣋𑣈𑣅𑣁.’ “𑢶𑣒𑣁𑣞𑣉𑣜, 𑣖𑣉𑣓𑣂𑣒𑣜𑣌𑣉 𑣈𑣖𑣓 𑣞𑣉𑣖𑣎𑣇 𑣕𑣓 𑣜𑣈𑣋𑣈 𑣖𑣈𑣓𑣄𑣌𑣉𑣁. 𑢾𑣖𑣁 𑣋𑣈𑣌𑣉 𑣚𑣋𑣁 𑣅𑣓 𑣚𑣈𑣌. 𑢬𑣌𑣉 𑣞𑣉𑣖𑣎𑣇 𑣔𑣆𑣅𑣆 𑣕𑣓 𑣋𑣈𑣅𑣁. 𑢾𑣖𑣁𑣌𑣉 𑣗𑣚𑣗𑣚 𑣚𑣃𑣖 𑣏𑣗𑣁 𑣅𑣓𑣁.” “𑢾𑣃𑣌𑣃𑣜𑣁 𑣖𑣁𑣚𑣁 𑣉𑣌𑣉𑣅’𑣄 𑣌𑣎𑣂 𑣎𑣌𑣈𑣑 𑣌𑣁𑢨 𑣁𑣁𑣅𑣃𑣖 𑣕𑣓𑣁. 𑢫𑣉𑣒𑣁 𑣖𑣉𑣀𑣑𑣉 𑣜𑣈𑢨 𑣌𑣌𑣁𑣚𑣁 𑣗𑣂𑣅𑣃𑣜 𑣁𑣌𑣁𑣑𑣁.” ‘𑢷𑣉𑣜𑣉 𑣋𑣈 𑣖𑣜𑣀 𑣕𑣂𑣘𑣂𑣄 𑣅𑣌𑣓 𑣕𑣈, 𑣙𑣘𑣁 𑣕𑣈𑣚𑣂𑣊 𑣓𑣂𑣜 𑣅𑣓𑣁. 𑢩𑣌𑣉𑣅 𑣎𑣌𑣈𑣑 𑣌𑣌𑣉 𑣏𑣂𑣜𑣋𑣚 𑣁𑣒𑣁𑣌𑣜 𑣌𑣈𑣑𑣚𑣂𑣊𑣁. ‘𑢾𑣗𑣂𑣓 ‘𑣆𑣕𑣓𑣁 𑣗𑣛𑣁 𑣌𑣁𑣀𑣒𑣁 𑣚𑣋𑣚𑣉! 𑢬𑣁𑣎𑣂 𑣜𑣈𑣌𑣉 𑣗𑣌𑣃𑣄 𑣁𑣌𑣓 𑣕𑣈𑣔𑣉.’ “𑣘𑣃𑣕𑣂-𑣞𑣈𑣚𑣁𑣒𑣂𑣌𑣉 𑣎𑣌𑣈𑣑 𑣎𑣌𑣈𑣑 𑣗𑣋𑣈 𑣅𑣕𑣃𑣇𑣆 𑣕𑣈𑣚𑣂𑣊 …. 𑣓𑣂𑣜 𑣅𑣓𑣁. 𑢡𑣅𑣜-𑣏𑣓𑣗 𑣙𑣈𑣕𑣁-𑣇𑣜𑣁𑣁 𑣋𑣈 𑣗𑣓𑣉𑣄, 𑣞𑣉𑣎𑣈 𑣖𑣃𑣚𑣂 𑣕𑣈𑣚𑣂𑣊 𑣓𑣂𑣜 𑣌𑣈𑣑𑣁. 𑢵𑣁𑣚𑣁 𑣙𑣉𑣜𑣁𑣌𑣉 𑣜𑣈 𑣕𑣂𑣊𑣋𑣃 𑣇𑣜𑣁𑣁 𑣋𑣈 𑣗𑣓𑣉, 𑣗𑣉𑣜𑣉 𑣋𑣈 𑣖𑣜𑣀 𑣖𑣈𑣓 𑣁𑣌𑣑 𑣋𑣈𑣅𑣁.” “𑢩×𑣄 𑣁𑣇𑣜𑣂 𑣗𑣈𑣒𑣁𑣅 𑣎𑣉𑣊𑣔𑣉 𑣞𑣘𑣁𑣗 𑣁𑣌𑣓 𑣕𑣂𑣘𑣂𑣄 𑣅𑣌𑣓 𑣕𑣈𑣋𑣈 𑣖𑣈𑣓𑣄𑣚𑣂𑣊𑣁. 𑢶𑣂𑣝𑣁 𑣕𑣈 𑣋𑣈𑣚𑣂𑣊 𑣓𑣂𑣜 𑣁𑣌𑣁𑣑𑣁. 𑢩×𑣄𑣚𑣂𑣊 𑣓𑣂𑣜 𑣗𑣈𑣒𑣁 𑣌𑣈𑣑 𑣋𑣈𑣅𑣁. 𑢺𑣈𑣈𑣖-𑣚𑣈𑣈𑣖 𑣕𑣓𑣚𑣂𑣊 𑣝𑣅𑣈𑣑𑣈 𑣕𑣓𑣁. 𑢾𑣖𑣁𑣚𑣂𑣊 𑣝𑣁𑣁𑣀-𑣞𑣃𑣃𑣀 𑣏𑣗𑣁 𑣅𑣓𑣁.” ‘𑢳𑣈𑣚 𑣕𑣉𑣜𑣞𑣁 𑣌𑣃𑣚𑣂 𑣕𑣓 𑣜𑣈𑣋𑣈 𑣖𑣈𑣓𑣄𑣌𑣉𑣁… 𑣏𑣂𑣓𑣄 𑣖𑣈𑣓𑣕𑣈𑣗𑣈𑣓 𑣓𑣂𑣜 𑣚𑣈𑣓𑣁?’ “𑢾𑣖𑣁 𑣋𑣈𑣚𑣂𑣍 𑣓𑣈𑣘𑣈𑣚 𑣕𑣓𑣁. 𑢬𑣎𑣂𑣖𑣁 𑣌𑣁 𑣜𑣈𑣓𑣙 𑣉𑢿 𑣕𑣓𑣁. 𑢡𑣙𑣔𑣉 𑣞𑣖𑣁 𑣋𑣈 𑣚𑣃𑣖𑣃𑣜-𑣚𑣃𑣖𑣃𑣜 𑣚𑣋𑣁𑣓 𑣕𑣓𑣁.” “𑢬𑣜𑣌𑣉𑣖𑣌𑣉 𑣗𑣂𑣚𑣑𑣚𑣂𑣊𑣁 𑣁𑣜 𑣌𑣜𑣌𑣉𑣖 𑣜𑣈𑣚𑣂𑣊 𑣔𑣃𑣗 𑣅𑣓𑣁. 𑢮𑣉𑣌𑣁 𑣋𑣙𑣁𑣛𑣂 𑣙𑣉𑣗𑣁 𑣅𑣓𑣁, 𑣖𑣁𑣀𑣑𑣂𑣌𑣉 𑣈𑣖𑣑𑣚𑣂𑣊𑣁. 𑢶𑣂𑣞𑣁𑣚𑣂𑣊 𑣓𑣈𑣘𑣈𑣚𑣁, 𑣖𑣂𑣞𑣁𑣚𑣂𑣊 𑣚𑣁𑣀𑣔𑣁𑣅𑣁, 𑣈𑣓𑣜𑣈𑣅 𑣌𑣚𑣂𑣊 𑣌𑣃𑣘𑣃𑣚𑣂 𑣕𑣓𑣁. 𑢶𑣂𑣑𑣕𑣄 𑣜𑣈 𑣔𑣃𑣗-𑣁𑣌𑣓 𑣕𑣈 𑣖𑣁𑣀𑣑𑣂 𑣎𑣉𑣖𑣚𑣂𑣊 𑣈𑣒𑣈𑣄 𑣌𑣈𑣑𑣁.” “𑢳𑣈𑣘𑣙 𑣌𑣌𑣁𑣚𑣁 𑣌𑣉𑣜𑣀 𑣕𑣃𑣜𑣞𑣀 𑣈𑣚𑣀 𑣕𑣈 𑣖𑣜𑣀 𑣔𑣁𑣆 𑣈𑣞𑣃𑢦 𑣖𑣉𑣓 𑣔𑣃𑣌𑣃 𑣅𑣓𑣁. 𑢺𑣁𑣀𑣔𑣁 𑣆𑣓𑣃𑣊 𑣕𑣓 𑣖𑣉𑣜𑣏𑣁 𑣖𑣉𑣏𑣁 𑣏𑣃𑣆𑣚𑣁 𑣋𑣈 𑣋𑣉𑣞𑣉 𑣕𑣉𑣜𑣞𑣁 𑣕𑣗 𑣅𑣓𑣁.” 𑢶𑣜𑣀 𑣔𑣁𑣆 – “𑢨𑣞𑣈𑣚 𑣗𑣈𑣜𑣈𑣚, 𑣗𑣕𑣁𑣜𑣂 𑣞𑣚𑣁𑣀𑣋𑣂, 𑣘𑣜𑣏𑣂 𑣞𑣘𑣁, 𑣚𑣈𑣞𑣈𑣜 𑣖𑣈𑣑-𑣖𑣉𑣏𑣁. 𑢬𑣁𑣎𑣂 𑣎𑣁𑣋𑣜 𑣚𑣁𑣁𑣜𑣓 𑣝𑣙𑣁𑣜𑣓 𑣞𑣂𑣗𑣂𑣚𑣓 𑣋𑣈𑣅𑣁. 𑢩𑣚 𑣘𑣛𑣁𑣉𑣌𑣉 𑣜𑣈 𑣎𑣂𑣕𑣂𑣌𑣜 𑣋𑣈 𑣖𑣈𑣓𑣄𑢨𑣅𑣁.” “𑢵𑣂𑣌𑣂𑣓 𑣞𑣉𑣖𑣅 𑣙𑣉𑣗𑣁 𑣅𑣓𑣁. 𑢩×𑣄 𑣜𑣁𑣏𑣁𑣌𑣉 𑣋𑣃𑣜𑣂𑣄 𑣞𑣘𑣁 𑣘𑣃𑣜𑣁 𑣅𑣓𑣁. 𑢶𑣉𑣀𑣑𑣉 𑣏𑣃𑣒𑣂 𑣅𑣓𑣁. 𑢾𑣗𑣂𑣓 𑣁𑣘𑣓 𑣔𑣘𑣆 𑣕𑣓𑣌𑣉 𑣞𑣈𑣓𑣉𑣄 𑣅𑣓𑣁.” ‘𑢬𑣉𑣜𑣉𑣈 𑣖𑣉𑣒𑣉𑣈 𑣕𑣓 𑢾𑣃𑣌𑣃𑣜𑣁 𑣖𑣁𑣚𑣁 𑣉×𑣄𑢨 𑣞𑣈𑣓𑣉𑣄 𑣇𑣜𑣁 𑣅𑣓𑣁.’ ‘𑢩𑣌𑣉𑣅’𑢨 𑣋𑣉𑣀𑣔𑣈 𑣈𑣜𑣀 𑣚𑣈𑣌𑣁𑣙𑣄! 𑢴𑣃𑣝𑣂𑣅𑣁𑣔𑣉 𑣖𑣈𑣓𑣄𑢨 𑣜𑣈𑣏𑣁.’ 𑢶𑣜𑣀 𑣔𑣁𑣆 – “𑢫𑣉𑣞𑣉-𑣋𑣉𑣞𑣉 𑣕𑣈𑣋𑣈𑢨 𑣞𑣈𑣓𑣉𑣄 𑣅𑣓𑣁. 𑢧𑣀𑣑𑣂 𑣕𑣈𑣌𑣂𑣊𑣄 𑣘𑣃𑣕𑣂-𑣞𑣈𑣚𑣁𑣒𑣂𑣌𑣉 𑣈𑣖𑣓𑣌𑣂𑣍 𑣙𑣈𑣜𑣗𑣈𑣑 𑣌𑣉𑣅𑣊 𑣕𑣉𑣜𑣞𑣁 𑣌𑣈𑣑𑣁.” ‘𑢶𑣃𑣚𑣂 𑣕𑣂𑣌𑣂𑣓 𑣎𑣌𑣈𑣑 𑣙𑣉𑣗𑣁 𑣅𑣓𑣁.’ ‘𑢹𑣉𑣓 𑢮𑣁𑣜𑣉𑣅 𑣘𑣂𑣙 𑣘𑣙 𑣅𑣕𑣈 𑣈𑣓𑣈𑢨 𑣋𑣈𑢨 𑣞𑣈𑣒𑣈𑣜 𑣁𑣌𑣁𑣓𑣁. 𑢬𑣜𑣌𑣉𑣖 𑣜𑣈𑢨 𑣔𑣃𑣗 𑣎𑣂𑣜𑣁𑣉 𑣁𑣌𑣁𑣓𑣁.’ ‘𑢬𑣂𑣚𑣂𑣖𑣂𑣚𑣂 𑣌𑣈𑣅𑣁𑣚 𑣇𑣛𑣃𑣄𑣌𑣉 𑣞𑣋𑣉𑣖 𑣇𑣓𑣃𑣊 𑣕𑣓 𑣜𑣈𑣋𑣈 𑣖𑣈𑣓𑣄𑢨𑣅𑣁 𑣏𑣂 … 𑣕𑣂𑣞𑣂𑣊𑣔𑣉 𑣏𑣂𑣚𑣂𑣌𑣁 𑣕𑣈 𑣞𑣂𑣄-𑣞𑣉𑣈 𑣕𑣓 𑣁𑣔𑣁𑣉𑣄 𑣕𑣓𑣁!’ ‘𑢳𑣈𑣘𑣙 𑢼𑣃𑣋𑣃𑣓𑣁 𑣕𑣈𑣌𑣂𑣊𑣖𑣁 𑣗𑣉𑣜𑣉 𑣕𑣈𑣌𑣂𑣊 𑣇𑣌𑣃 𑣁𑣌𑣁𑣓𑣁. 𑢮𑣘𑣄 𑣋𑣈 𑣌𑣌𑣂𑣊 𑣎𑣘𑣄𑣁𑣓 𑣕𑣓𑣁. 𑢷𑣉𑣜𑣉 𑣋𑣂𑣅𑣃𑣄𑣔𑣉 𑣗𑣃𑣋𑣂𑣓𑣁 𑣏𑣂𑣕𑣈? 𑢶𑣜𑣀 𑣔𑣁𑣆 𑢥 𑣌𑣁𑢨 𑣚𑣁𑣀𑣔𑣁 𑣎𑣋𑣜-𑣗𑣁𑣅 𑣕𑣓𑣁. 𑢶𑣁𑣀𑣑𑣂-𑢴𑣌𑣉 𑣞𑣗 𑣒𑣉𑣄-𑣗𑣁 𑣌𑣈𑣑 𑣈𑣓𑣀 𑣖𑣜𑣀 𑣔𑣁𑣆 𑣋𑣈 𑣞𑣗𑣂𑣓𑣄𑢨 𑣎𑣋𑣁𑣜𑣆 𑣕𑣓𑣁.’ ‘𑢹𑣉𑣓 𑢮𑣁𑣜𑣉𑣅 𑣗𑣃𑣋𑣂 𑣚𑣈𑣌𑣁 𑣕𑣈𑢨 𑣁𑣅𑣃𑣖 𑣌𑣈𑣑𑣁 𑣁𑣜 𑣎𑣂𑣗𑣉𑣓 𑣜𑣈𑢨 𑣞𑣉𑣌𑣉𑣈 𑣞𑣚𑣁 𑣏𑣘𑣂 𑣌𑣈𑣑𑣁 𑣏𑣂 𑣞𑣂𑣒𑣂𑣅𑣁 𑣞𑣉𑣖𑣅𑣔𑣉 𑣓𑣈𑣌𑣁 𑣎𑣕𑣂𑣅𑣁!’ ‘𑢩𑣌𑣉𑣅 𑣏𑣂𑣓𑣄𑢨 𑣈𑣜𑣀 𑣋𑣉𑣀𑣔𑣈 𑣚𑣈𑣌𑣁𑣙𑣄!’ ‘𑢨𑣜𑣀 𑣋𑣉𑣀𑣔𑣈𑣌𑣉𑣔𑣉𑢨 𑣈𑣕𑣉𑣁𑣓 𑣜𑣈𑣏𑣁!’ ‘𑢶𑣜𑣀 𑣁𑣙𑣌𑣉 𑣕𑣈 𑣏𑣃𑣆𑣚𑣁𑣉 𑣌𑣁𑢨 𑣌𑣙𑣎𑣂𑣅𑣁.’ ‘𑢯𑣂𑣖𑣂𑣓 𑣆𑣌𑣂𑣜 𑣎𑣂𑣗𑣉𑣓 𑣜𑣁𑣁𑣀𑣞𑣁 𑣜𑣞𑣂𑣌𑣁 𑣕𑣈 𑣙𑣉𑣓𑣌𑣉𑢨 𑣉𑣚-𑣘𑣛𑣁𑣉, 𑣝𑣈𑣅𑣁𑣀𑣌𑣉 𑣕𑣈𑢨 𑣞𑣁𑣎 𑣝𑣂𑣀𑣋𑣜𑣌𑣉 𑣕𑣓𑣁, 𑣖𑣈𑣓𑣔𑣉 𑣈𑣒𑣄𑣌𑣉𑣁𑣄 𑣎𑣂𑣙 𑣌𑣃×𑣖 𑣜𑣈 𑣙𑣂𑣀𑣞𑣁-𑣏𑣈𑣐𑣒𑣁, 𑣌𑣃𑣞𑣃𑣜𑣌𑣉 𑣇𑣞𑣌𑣃𑣜 𑣁𑣔𑣈𑣜 𑣅𑣓𑣁. 𑢶𑣈𑣕𑢶 𑣌𑣌𑣉 𑣓𑣈𑣚 𑣞𑣙𑣕𑣂𑣊 𑣔𑣆 𑣅𑣓𑣁!’ ‘𑢳𑣈𑣓 𑣙𑣉𑣓 𑢮𑣁𑣜𑣉𑣅 𑣚𑣉𑣉𑣄𑣔𑣉 𑣌𑣁 𑣙𑣉𑣗𑣁𑣉𑣄𑣁!’ “𑢽𑣂𑣊 𑣞𑣃𑣗𑣁 𑣔𑣁𑣜𑣃 𑣞𑣃𑣗𑣁𑣓, 𑣗𑣁𑣚𑣁 𑣞𑣌𑣁𑣓𑣌𑣉𑢨 𑣞𑣁𑣎-𑣝𑣂𑣀𑣋𑣜 𑣕𑣓𑣁! 𑢾𑣖𑣁 𑣜𑣈 𑣗𑣁𑣗𑣁 𑣗𑣂𑣕𑣂, 𑣘𑣉𑣅𑣞𑣁 𑣒𑣁𑣌𑣁𑢨 𑣌𑣜𑣏𑣁 𑣚𑣋𑣁𑣓 𑣕𑣓𑣁!” ‘𑢬𑣃𑣆 𑣙𑣉𑣓𑣌𑣉𑣔𑣉 𑣉𑣌𑣉𑣅 𑣘𑣛𑣁𑣉 𑣆𑣏𑣂𑣆𑣅𑣁!’ “𑢳𑣈𑣓 𑣌𑣁𑣎𑣂 𑣋𑣉𑣒𑣁 𑣖𑣃𑣚𑣂 𑣈𑣒𑣈𑣄-𑣘𑣂𑣕𑣂𑣑 𑣎𑣓𑣈 𑣅𑣓𑣁, 𑣖𑣈𑣓𑣔𑣉 𑣁𑣅𑣄 𑣎𑣂𑣙-𑣌𑣃×𑣖 𑣜𑣈 𑣖𑣁𑣓𑣂 𑣎𑣀 𑣌𑣓 𑣋𑣂𑣞𑣂𑣜 𑣋𑣖𑣀, 𑣗ê𑣒𑣈𑣊𑣌𑣉 𑣎𑣌𑣈𑣑 𑣗𑣓𑣉𑣄 𑣅𑣓𑣁. 𑢹𑣂𑣀𑣞𑣁-𑣏𑣈𑣐𑣒𑣁, 𑣌𑣃𑣞𑣃𑣜𑣌𑣉 𑣜𑣈𑣅𑣄 𑣈𑣚𑣀 𑣕𑣃𑣜𑣞𑣀𑣌𑣉 𑣎𑣌𑣈𑣑 𑣞𑣗𑣂𑣓 𑣚𑣞𑣃𑣜 𑣞𑣜𑣗𑣃𑣑 𑣅𑣓𑣁.” 𑢶𑣈𑣑 𑣜𑣈𑣋𑣈𑢨 𑣌𑣙𑣎𑣂𑣅𑣁 -… “𑢹𑣁𑣕𑣂𑣔𑣉𑢨 𑣞𑣈𑣓𑣈 𑣋𑣈𑣅𑣁, 𑣞𑣈𑣕𑣁𑣔𑣉𑢨 𑣗𑣃𑢧𑣅 𑣋𑣈𑣅𑣁.” “𑢹𑣉𑣓𑣌𑣉𑣔𑣉 𑣙𑣉𑣓 𑣋𑣈𑣌𑣉 𑣖𑣈𑣕𑣁𑣌𑣉𑣁. 𑢬𑣉×𑣁 𑣙𑣉𑣓 𑣜𑣈𑢥 𑣋𑣈 𑣁𑣜 𑣌𑣃𑣆 𑣙𑣉𑣓 𑣜𑣈𑢥 𑣙𑣉𑣓 𑣋𑣈. 𑢨𑣊𑣋𑣁-𑣁𑣘𑣃𑣌𑣉 𑣜𑣈 𑣔𑣃𑣚𑣁𑣛𑣔𑣉 𑣗𑣜𑣁𑣗𑣜𑣂 𑣋𑣈 𑣒𑣆𑣓𑣁.” “𑢾𑣂𑣒𑣂𑣅𑣁 𑣙𑣉𑣓 𑣚𑣈𑣌𑣁𑢨 𑣓𑣈𑣚𑣉𑣄𑣁 𑣈𑣓𑣁𑣖𑣈𑣓𑣕𑣈 ‘𑢹𑣉𑣓 𑢮𑣁𑣜𑣉𑣅’𑣌𑣉 𑣖𑣈𑣕𑣆𑣅𑣁. 𑢼𑣁𑣁𑣀𑣞𑣁 𑣕𑣈 ‘𑢮𑣁𑣜𑣉𑣅 𑣌𑣉×𑣁’𑣌𑣉 𑣖𑣈𑣕𑣆𑣅𑣁. 𑢩𑣕𑣈 𑣙𑣁𑣝𑣁𑣔𑣉 𑣎𑣁𑣒𑣂 𑣚𑣈𑣌𑣁 𑣗𑣂𑣚-𑣁𑣌𑣁𑣓𑣁. 𑢾𑣃𑣌𑣃𑣜𑣂 𑣋𑣃𑣅𑣃 𑣉×𑣄 𑣖𑣈𑣓-𑣁𑣌𑣑 𑣋𑣈𑣅𑣁. 𑢹𑣁𑣕𑣃 𑣎𑣘𑣄 𑢸𑣃𑣜𑣕𑣂𑣌𑣉 𑣎𑣌𑣈𑣑 𑣞𑣃𑣌𑣃𑣜𑣂 𑣋𑣃𑣅𑣃 𑣓𑣈𑣚 𑣌𑣈𑣑𑣕𑣈𑣌𑣉 𑣁𑣜𑣁 𑣘𑣉𑣏𑣁 𑣌𑣂𑢦𑣅𑣁.” “𑢶𑣂𑣅𑣑 𑣗𑣁𑣀𑣔𑣁 𑣜𑣈𑣌𑣉 𑣉𑣛𑣁𑣓𑣁 ‘𑢾𑣅𑣉𑣗 𑣗𑣁𑣀𑣔𑣁’𑣌𑣉 𑣖𑣈𑣕𑣄. 𑢬𑣁𑣀𑣔𑣁-𑢶𑣁𑣀𑣔𑣁 𑣗𑣃𑣜𑣃 𑣋𑣂𑣓𑣂𑣚 𑣜𑣈 ‘𑢾𑣅𑣉𑣗 𑣗𑣁𑣀𑣔𑣁’𑣖𑣁 𑣖𑣈𑣓𑣄. 𑢷𑣈𑣛𑣁 𑣚𑣊𑣋𑣉𑣜 𑣙𑣁𑣕𑣃 𑣌𑣃𑣒𑣂-𑣌𑣃𑣒𑣂 𑣕𑣈 𑢳𑣋𑣜 𑣙𑣁𑣁𑣒𑣉𑣌𑣉𑣔𑣉𑣌𑣉 𑣙𑣃𑣎𑣃𑣄-𑣞𑣈𑣓𑣉𑣄𑣁. 𑢡𑣘𑣁𑣞𑣉𑣜𑣁𑣈𑣌𑣉𑣔𑣉 𑣙𑣉𑣗𑣁 𑣚𑣈𑣓 𑣜𑣈𑢥 𑣋𑣈, 𑣓𑣉𑣞𑣂𑣗 𑣏𑣂𑣚𑣂𑣌𑣁, 𑣈𑣓𑣚𑣈𑣌𑣁 𑣋𑣈 𑣙𑣉𑣗𑣁𑣓𑣁.” “𑢹𑣃𑣛𑣂𑣊 𑣜𑣈𑣋𑣈𑢨 𑣁𑣀𑣗𑣁𑣜𑣉𑣗 𑣅𑣓𑣁. 𑢡𑣘𑣃𑣁𑣄 𑣚𑣁𑣛-𑣔𑣃𑣚𑣁𑣛𑣌𑣉 𑣌𑣁 𑣓𑣉𑣞𑣂𑣗’𑢨𑣅𑣁. 𑢶𑣈𑣓𑣔𑣉 𑣈𑣊𑣋𑣁𑣕𑣈 𑣈𑣞𑣃 𑣕𑣈𑣎 𑣙𑣃𑣝𑣂𑣅𑣜, 𑣏𑣃𑣕𑣃𑣜 𑣌𑣃𑣆 𑣙𑣉𑣓’𑢨 𑣒𑣆𑣌𑣈𑣓𑣁. 𑢴𑣃𑣌𑣃 𑣋𑣈 𑣖𑣜𑣀 𑣞𑣃𑣌𑣃 𑣕𑣈𑢨 𑣙𑣜𑣁 𑣖𑣜𑣀 𑣌𑣂𑢦𑣅𑣁. 𑢾𑣂𑣒𑣂𑣅𑣁 𑣞𑣉𑣖𑣅 𑣖𑣃𑣜𑣃𑣌𑣃 𑣇𑣛𑣃𑣄 𑣖𑣈𑣓𑣁𑣌𑣑 𑣋𑣈𑣅𑣁. 𑢩𑣚-𑣘𑣛𑣁𑣉 𑣜𑣁𑣁𑣀𑣞𑣁𑣌𑣉 𑣅𑣕𑣈𑢨 𑣏𑣓𑣗 𑣅𑣓𑣁.” ‘𑢶𑣉𑣀𑣑𑣉𑣔𑣉𑢨 𑣞𑣈𑣓-𑣗𑣁 𑣚𑣈𑣓 𑣋𑣈𑣅𑣁. 𑢹𑣃𑣎𑣃𑣄-𑣞𑣈𑣓𑣉𑣄 𑣕𑣈 𑣙𑣉𑣜𑣁𑣌𑣉 𑣎𑣌𑣈𑣑 𑣔𑣉𑣛𑣁 𑣑𑣌𑣃𑣑 𑣅𑣓 𑣋𑣈𑣅𑣁. 𑢸𑣃𑣜𑣄 𑣉𑣚-𑣘𑣛𑣁𑣉𑣌𑣉 𑣗𑣓𑣉𑣄 𑣅𑣓 𑣜𑣈𑢥 𑣋𑣈 𑣝𑣈𑣅𑣁𑣀-𑣏𑣃𑣕𑣃𑣜 𑣌𑣉𑣖𑣁 𑣖𑣈𑣓𑣄 𑣎𑣕𑣂𑣅𑣁. 𑢩𑣌𑣉𑣅 𑣌𑣎𑣂 𑣕𑣈 𑢾..𑢦..𑢧-𑣌𑣉𑣖𑣁𑢨 𑣘𑣁𑣞 𑣕𑣑𑣁. 𑢮𑣁𑣓 𑣌𑣎𑣂 𑣗𑣓𑣉𑣄𑣁.’ “𑢾𑣅𑣉𑣗 𑣎𑣜𑣂 𑣘𑣛𑣁𑣉 𑣖𑣈𑣓𑣁𑣌𑣑 𑣋𑣈𑣅𑣁. 𑢮𑣉𑣗𑣉𑣜𑣔𑣉𑣞𑣂𑣌𑣉 𑣘𑣛𑣁𑣉 𑣆𑣏𑣂𑣌𑣉 𑣕𑣓 𑣒𑣆𑣌𑣈𑣓𑣁. 𑢩𑣚-𑣘𑣛𑣁𑣉 𑣜𑣈𑣅𑣄 𑣜𑣁𑣁𑣀𑣞𑣁𑣖𑣁 𑣙𑣞𑣂𑣑 𑣅𑣓 𑣚𑣈𑣌𑣄. 𑢨𑣒𑣄𑣌𑣉𑣁𑣄 𑣘𑣛𑣁𑣉 𑣌𑣗𑣃 𑣘𑣛𑣁𑣉𑣁 𑣖𑣈𑣓𑣕𑣈 𑣆𑣞𑣌𑣃𑣚-𑣌𑣉𑣚𑣈𑣎 𑣌𑣌𑣉 𑣞𑣈𑣓 𑣕𑣓 𑣒𑣆𑣌𑣈𑣓𑣁.” “𑢩×𑣄-𑣌𑣉𑣏𑣁𑣌𑣉 𑣜𑣈 𑣎𑣌𑣈𑣑𑣌𑣉 𑣇𑣌𑣃𑣓 𑣕𑣓 𑣒𑣆𑣌𑣈𑣓𑣁. 𑢨𑣓 𑣜𑣈𑢥 𑣎𑣉𑣗𑣉𑣜𑣔𑣉𑣝𑣂 𑣞𑣗 𑣆𑣑𑣂 𑣌𑣈𑣑𑣌𑣉 𑣅𑣕𑣈 𑣞𑣅𑣉𑣗 𑣘𑣛𑣁𑣉 𑢦𑣊𑣋𑣚𑣂𑣂𑣝𑣌𑣉 𑣘𑣛𑣁𑣉𑣌𑣉 𑣕𑣓 𑣒𑣆𑣌𑣈𑣓𑣁. 𑢾𑣅𑣉𑣗 𑣎𑣁𑣜𑣂 𑣌𑣗𑣃𑣁𑣄𑣌𑣉 𑣖𑣈𑣓𑣈 𑣕𑣓 𑣜𑣈𑢥 𑣋𑣈 𑣕𑣅𑣉𑣖𑣔𑣉 𑣘𑣛𑣁𑣉 𑣅𑣓 𑣕𑣈 𑣙𑣉𑣗𑣁 𑣅𑣓𑣁.” “𑣚𑣈𑣍𑣗𑣉𑣍 𑣕𑣓 𑣗𑣕𑣁𑣜𑣂-𑣞𑣚𑣁𑣀𑣋𑣂 𑣕𑣓’𑢨 𑣙𑣜𑣁-𑣖𑣜𑣀 𑣞𑣈𑣘𑣈𑣈𑣑 𑣅𑣓𑣁𑢨.” “𑢷𑣚𑣈𑣄 𑣞𑣈𑣘𑣈𑣈𑣑 𑣕𑣉𑣜𑣞𑣁 𑣋𑣈 𑢷𑣁𑣒𑣂𑣋𑣃𑣒𑣃 𑢷𑣃𑣛𑣂𑣇𑣚𑣂𑣌𑣉 𑣖𑣈𑣕𑢶 ‘𑣁𑣜𑣁’ 𑣞𑣚𑣁 𑣌𑣂𑢦𑣅𑣁. 𑢯𑣃𑣆𑣚𑣁 𑣋𑣈 𑣞𑣃𑣌𑣃𑣜𑣂 𑣋𑣃𑣅𑣃𑣌𑣉 𑣖𑣈𑣕𑢶 𑣗𑣉𑣔𑣉𑣚 𑣕𑣗 𑣅𑣓𑣁. 𑢾𑣗𑣂𑣓 𑣉×𑣄𑣌𑣉 𑣅𑣕𑣈 𑣖𑣜𑣀 𑣋𑣈 𑣓𑣈𑣚 𑣕𑣗 𑣅𑣓𑣁. 𑢳𑣙𑣄 𑣎𑣌𑣈𑣑 𑣈𑣓𑣁𑣖𑣈𑣓𑣕𑣈 ‘𑣖𑣜𑣀 𑣉×𑣄’𑣌𑣉 𑣖𑣈𑣓𑣈𑣅𑣁.” “𑢺𑣃𑣋𑣖 𑣁𑣐𑣁 𑣞𑣁𑣔𑣃 𑣖𑣃𑣓𑣂𑣌𑣉 𑣚𑣈𑣌𑣁𑣌𑣉 𑣖𑣈𑣓𑣈𑣅𑣁. 𑢨𑣓 𑣚𑣈𑣌𑣁 𑣋𑣈 𑣖𑣈𑣕𑢶 𑣙𑣉𑣓 𑣋𑣐𑣁𑣌𑣉 𑣁𑣐𑣁 𑣇𑣓𑣃𑣊 𑣜𑣈𑣋𑣈𑢨 𑣌𑣃𑣜𑣃𑣖𑣃𑣒𑣃 𑣚𑣈𑣓𑣁. 𑢹𑣉𑣓 𑣋𑣁𑣐𑣁𑣌𑣉 𑣁𑣐𑣁 𑣇𑣓𑣃𑣊𑣌𑣉 𑣜𑣈𑢥 𑣞𑣗𑣂𑣓𑣌𑣉 𑣅𑣕𑣈𑢨 𑣁𑣅𑣈𑣜 𑣚𑣈𑣓 𑣋𑣈𑣅𑣁.” “𑢨𑣓𑣚𑣈𑣌𑣁 𑣋𑣈 𑣙𑣁𑣕𑣃 𑣞𑣁𑣆 𑣜𑣈 𑣁𑣅𑣄 𑣙𑣉𑣓𑣌𑣉 𑣋𑣈 𑣉𑣚-𑣘𑣛𑣁𑣉𑣌𑣉 𑣜𑣈𑣖𑣁 𑣚𑣓𑣙𑣄 𑣜𑣈𑣓𑣙 𑣅𑣓𑣁. 𑢾𑣁𑣜𑣂 𑣌𑣁𑣎𑣂 𑣝𑣙𑣁𑣜𑣓 𑣋𑣈𑣅𑣁 – “𑢬𑣉×𑣁 𑣌𑣃𑣆 𑣜𑣈 𑣎𑣁𑣓 𑣕𑣀𑣊𑣓 𑣗𑣓𑣉𑣄𑣁, 𑢩𑣚 𑣘𑣛𑣁𑣉 𑣜𑣈 𑣎𑣁𑣓 𑣗𑣜𑣉𑣓 𑣗𑣓𑣉𑣄𑣁!” “𑢹𑣂𑣚𑣁-𑣙𑣂𑣘𑣂𑣚𑣁𑣔𑣉 𑣗𑣃𑣋𑣂𑣓𑣁 𑣏𑣂𑣕𑣈! ‘𑢾𑣉𑣅 𑣞𑣉𑣜𑣘𑣄’ 𑣖𑣈𑣓𑣌𑣉 𑣕𑣈𑣌𑣉 𑣚𑣁𑣀𑣔𑣁 𑣝𑣈𑣅𑣁𑣀 𑣕𑣓 𑣋𑣈𑣅𑣁. 𑢶𑣈𑣓𑣔𑣉, 𑣚𑣈𑣞𑣈𑣜 𑣋𑣈𑣌𑣉 𑣖𑣃𑣒𑣁-𑣁𑣓𑣁𑣌𑣉 𑣖𑣈𑣓𑣈𑣅𑣁. 𑢹𑣉𑣓 𑢮𑣁𑣜𑣉𑣅 𑣜𑣈𑢥 𑣋𑣈 𑣖𑣈𑣑-𑣖𑣉𑣏𑣁𑣌𑣉𑣖𑣁 𑣚𑣈𑣞𑣈𑣜 𑣋𑣈𑣅𑣁. 𑢴𑣄-𑣋𑣁𑣖𑣁 𑣞𑣃𑣖𑣃𑣌𑣂 𑣚𑣈𑣌𑣁 𑣋𑣈 𑣔𑣁𑣞𑣂-𑣏𑣂𑣕𑣂𑣜𑣁𑣌𑣉 𑣜𑣈𑣅𑣄 𑣜𑣂𑣊𑣋𑣁 𑣌𑣁 𑣒𑣆𑣌𑣈𑣓𑣁. 𑢨𑣓 𑣚𑣈𑣌𑣁 𑣋𑣈 𑣌𑣈𑣛𑣁-𑣇𑣜𑣃𑣄 Ù𑣀𑣜𑣌𑣉 𑣕𑣈 𑣌𑣌𑣉 𑣜𑣂𑣊𑣋𑣁 𑣚𑣈𑣓𑣁.” “𑢶𑣜𑣀 𑣋𑣉𑣖𑣌𑣈 𑣖𑣈𑣓𑣕𑣈 𑣔𑣁𑣞𑣂 𑣏𑣂𑣕𑣂𑣜𑣁𑣌𑣉 𑣎𑣌𑣈𑣑 𑣁𑣅𑣄 𑣖𑣁𑣓-𑣝𑣃𑣖𑣁𑣓𑣌𑣉 𑣞𑣆𑣕𑣂𑣗𑣁 𑣚𑣈𑣑𑣁. ‘𑢯𑣁𑣞 𑣜𑣈𑣅𑣄 𑣕𑣁𑣌’ 𑣖𑣈𑣓 𑣚𑣈𑣌𑣁 𑣘𑣆𑣒𑣂𑣌𑣉 𑣜𑣈 𑣎𑣉𑣌𑣁𑣉 𑣌𑣁𑢨 𑣏𑣓𑣁𑣗𑣈𑣓𑣁. 𑢴𑣁𑣞𑣂-𑣏𑣂𑣕𑣂𑣜𑣁𑣌𑣉𑣖𑣁𑢨 𑣈𑣚𑣀-𑣔𑣉𑣚𑣀 𑣕𑣗𑣌𑣉𑣁. 𑢸𑣂𑣙 𑣘𑣆𑣒𑣂 𑣞𑣂𑣅𑣃𑣄𑣌𑣉 𑣜𑣈 𑣈𑣞𑣃𑢦 𑣎𑣃𑣚𑣃𑣊 𑣋𑣈𑣅𑣁. 𑢮𑣈𑣒𑣈 𑢮𑣁𑣜𑣋𑣂 𑢾𑣜𑣔𑣂𑣌𑣉 𑣜𑣈 𑣖𑣈𑣕𑢶’𑢨 𑣔𑣂𑣒𑣁𑣅 𑣋𑣈𑣅𑣁.” “𑢸𑣃𑣜𑣄 𑣉𑣚 𑣘𑣛𑣁𑣉 𑣗𑣓𑣉𑣄 𑣜𑣈𑢥 𑣋𑣈, 𑣝𑣈𑣅𑣁𑣀 𑣏𑣃𑣕𑣃𑣜 𑣌𑣉𑣖𑣁 𑣖𑣈𑣓𑣄 𑣋𑣈𑣅𑣁. 𑢸𑣛𑣁𑣉 𑣎𑣁𑣀𑣋𑣂 𑣜𑣈𑣅𑣄 𑣓𑣃𑣕𑣃𑣖𑣌𑣉𑣔𑣉 𑣗𑣃𑣋𑣂 𑣚𑣈𑣌𑣁 𑣕𑣈𑢨 𑣁𑣔𑣁𑣙𑣓𑣁. 𑢾𑣂𑣗𑣂𑣚 𑣓𑣊𑣋𑣉𑣑 𑣋𑣈𑢨 𑣎𑣋𑣜 𑣈𑣕𑣉𑣅𑣁. 𑢴𑣁𑣒𑣁 𑣋𑣈 𑣁𑣇𑣜𑣂𑢦 𑣋𑣞𑣁𑣜𑣉𑣄 𑣜𑣈𑢥 𑣋𑣈 𑣖𑣜𑣀 𑣌𑣉×𑣁 𑣙𑣉𑣓 𑣈𑣞𑣁𑢨 𑣌𑣃𑣚𑣂 𑣌𑣉𑣓𑣉𑣄 𑣕𑣓 𑣋𑣈𑣅𑣁 – ‘𑢶𑣈𑣒ÿ𑣂𑣌𑣌𑣉 𑣘𑣁𑣞 𑣌𑣈𑣙 𑣜𑣈𑣔𑣉 𑣏𑣂𑣓𑣄𑣌𑣉 𑣘𑣛𑣁𑣉𑣁?’ ‘𑢡𑣆. 𑢨𑣈.𑣌𑣉 𑣘𑣛𑣁𑣉𑣁.’ ‘𑢡𑣆. 𑢨𑣈.𑣌𑣉 𑣘𑣁𑣞 𑣌𑣈𑣙 𑣜𑣈𑣔𑣉?’ ‘𑢷𑣂. 𑢨𑣈.𑣌𑣉 𑣘𑣛𑣁𑣉𑣁.’ ‘𑢷𑣂. 𑢨𑣈.𑣌𑣉 𑣘𑣁𑣞 𑣌𑣈𑣙 𑣜𑣈𑣔𑣉?’ ‘𑢨𑣖. 𑢨𑣈.𑣌𑣉 𑣘𑣛𑣁𑣉𑣁.’ ‘𑢨𑣖. 𑢨𑣈.𑣌𑣉 𑣘𑣁𑣞 𑣌𑣈𑣙 𑣜𑣈𑣔𑣉?’ ‘𑢺𑣉𑣉.𑣌𑣉 𑣘𑣛𑣁𑣉𑣁.’ ‘𑢨𑣓 𑣚𑣈𑣌𑣁 𑣕𑣈 𑣖𑣜𑣀 𑣔𑣁𑣔𑣁 𑣞𑣂𑣒𑣂𑣅𑣁 𑣞𑣉𑣖𑣅 𑣜𑣈𑣋𑣈 𑣉𑣚 𑣘𑣛𑣁𑣉 𑣜𑣈𑣅𑣄 𑣝𑣈𑣅𑣁𑣀 𑣎𑣋𑣜𑣌𑣉 𑣖𑣁 𑣈𑣀𑣋𑣁-𑣁𑣘𑣃𑣌𑣉 𑣕𑣄 𑣁𑣅𑣕𑣈 𑣋𑣈𑢨 𑣌𑣃𑣚𑣂 𑣈𑣕𑣉𑣁𑣓𑣁.’ ‘𑢳𑣈𑣓 𑣝𑣈𑣅𑣁𑣀 𑣕𑣃𑣇𑣖-𑣗𑣉𑣏𑣉𑣓𑣌𑣉 𑣖𑣁 𑣞𑣂𑣒𑣂𑣅𑣁 𑣞𑣉𑣖𑣅𑣌𑣉 𑣜𑣈𑣋𑣈 𑣖𑣉𑣚𑣊𑣌𑣉 𑣜𑣈 𑣞𑣉𑣚𑣊 𑣅𑣓 𑣋𑣈𑣅𑣁, 𑣙𑣁𑣕𑣀𑣌𑣉 𑣜𑣈 𑣁𑣕𑣀 𑣅𑣓 𑣋𑣈𑣅𑣁. 𑢦𑣌𑣂𑣜 𑣎𑣂𑣗𑣉𑣓 𑣆𑣂𑣖-𑣞𑣚𑣉𑣖𑣌𑣉 𑣜𑣈 𑣕𑣁𑣀𑣗𑣁𑣜𑣃𑣗 𑣞𑣜𑣃𑣗 𑣅𑣓 𑣋𑣈𑣅𑣁.’ 𑢵𑣅𑣉𑣖 𑣓𑣈𑣓 𑣕𑣃𑣇𑣖-𑣗𑣉𑣏𑣉𑣓𑣌𑣉𑣖𑣁 𑣘𑣃𑣜𑣁 𑣅𑣓 𑣋𑣈𑣅𑣁. “𑢹𑣁𑣕𑣃-𑣔𑣂𑣝𑣃𑣖 𑣜𑣈𑣖𑣁 𑣘𑣉𑣜𑣉𑣗-𑣘𑣉𑣓𑣆 𑣜𑣈𑣅𑣄 𑣖𑣓𑣁𑣕𑣂𑣊 𑣉𑣕𑣊 𑣔𑣉𑣝𑣕𑣃𑣜𑣌𑣉 𑣖𑣈𑣓𑣄 𑣋𑣈𑣅𑣁. 𑢶𑣂𑣆 𑣝𑣂𑣜𑣖𑣁 𑣜𑣈𑣅𑣄 𑣘𑣉𑣜𑣉𑣗 𑣖𑣈𑣓𑣕𑣈 𑣈𑣞𑣃 𑣋𑣈 𑣜𑣁𑣁𑣀𑣞𑣁 𑣜𑣞𑣂𑣌𑣁 𑣕𑣈𑣌𑣉 𑣖𑣓𑣁𑣕𑣂𑣊𑣁. 𑢸𑣉𑣜𑣉𑣗-𑣘𑣉𑣓𑣆 𑣜𑣈𑣅𑣄 𑣜𑣁𑣁𑣀𑣞𑣁 𑣜𑣞𑣂𑣌𑣁𑣖𑣁 𑣝𑣂𑣜𑣎𑣉𑣓 𑣜𑣈𑣋𑣈 𑣞𑣜𑣃𑣗-𑣁𑣌𑣁𑣓𑣁. 𑢳𑣈𑣓 𑣜𑣁𑣁𑣀𑣞𑣁 𑣜𑣞𑣂𑣌𑣁𑣖𑣁 𑣌𑣉×𑣁-𑣌𑣃𑣆 𑣜𑣈 𑣗𑣜𑣁𑣗𑣜𑣂 𑣕𑣈 𑣖𑣈𑣓𑣄 𑣋𑣈𑣅𑣁. 𑢶𑣓𑣉×𑣁𑣌𑣉 𑣜𑣈 𑣔𑣁𑣖𑣁-𑣔𑣃𑣖𑣀, 𑣝𑣃𑣞𑣃𑣓 𑣔𑣃𑣜𑣀𑣌𑣉 𑣜𑣈𑣅𑣄 𑣜𑣁𑣁𑣀𑣞𑣁 𑣖𑣈𑣕𑢶 𑣖𑣈𑣓𑣄 𑣎𑣕𑣂𑣅𑣁.” “𑢶𑣜𑣀 𑣋𑣉𑣖𑣌𑣈 𑣖𑣈𑣓𑣕𑣈 𑣞𑣃𑣖𑣑𑣖𑣁 𑣗𑣓𑣉, 𑣘𑣉𑣜𑣉𑣗 𑣋𑣃𑣞𑣂𑣅𑣁 𑣖𑣈𑣓𑣌𑣉 𑣕𑣈𑣌𑣉 𑣚𑣈𑣌𑣁 𑣖𑣂𑣝𑣁𑣆 𑣕𑣓 𑣋𑣈𑣅𑣁. 𑢽𑣃𑣞𑣃𑣓 𑣔𑣃𑣜𑣀 𑣗𑣔𑣁𑣗𑣔𑣂𑣌𑣉 𑣜𑣈 𑣎𑣉𑣌𑣁 𑣎𑣌𑣈𑣑 𑣌𑣁𑢨 𑣇𑣝𑣁𑣓𑣁. 𑢴𑣁𑣖𑣁-𑣔𑣃𑣖𑣀𑣌𑣉 𑣜𑣈𑣖𑣁𑢨 𑣎𑣂𑣕𑣂𑣌𑣜𑣈𑣓 𑣋𑣈𑣅𑣁.” 𑢱𑣜. 𑢮𑣁𑣓𑣃𑣖 𑢾𑣂𑣍 𑢾𑣉𑣅 ‘𑢾𑣉𑣅 𑢽𑣅𑣉𑣗’